Dansverkstæðið hefur verið heimili og hjarta íslenskrar danslistar allt frá stofnun þess árið 2010. Það gegnir lykilhlutverki í innviðum listgreinarinnar og er eini samastaður sjálfstætt starfandi danslistafólks á Íslandi. Dansverkstæðið er ekki aðeins húsnæði heldur burðarás í uppbyggingu heillar listgreinar, miðpunktur og flaggskip íslenskrar danslistar þar sem faglegt samfélag verður til, þekking flyst á milli kynslóða og ný verkefni fæðast.

​

Dansverkstæðið hýsir jafnframt starfsemi lykilaðila í danslist og öðrum sviðslistum, þar á meðal Reykjavík Dance Festival, Félag íslenskra listdansara og ASSITEJ barnamenningarhátíð, auk þess sem félög á borð við Sviðslistasambands Íslands og Félag íslenskra leikara og sviðslistafólks nýta aðstöðuna fyrir fundi og verkefni. 

​

Árlega ræður Dansverkstæðið til sín tugi danslistafólks til að leiða þjálfunartíma, námskeið og veita faglega ráðgjöf, sem styrkir faglegt umhverfi greinarinnar og skapar atvinnu- og þróunartækifæri. Auk fagfólks sækir almenningur í auknum mæli sýningar og viðburði á vegum Dansverkstæðisins. Gott aðgengi tryggir jafnframt þátttöku fatlaðs fólks og undirstrikar hlutverk Dansverkstæðisins sem aðgengilegs og mikilvægs innviðar í íslensku menningarlífi.

​​